ҲУКУМАТИ ҶУМҲУРИИ ТОҶИКИСТОН
ҚАРОР
ДАР БОРАИ БАРНОМАИ РУШДИ СОҲАИ ЗОТПАРВАРӢ ВА ХУШЗОТКУНИИ ЧОРВО
ДАР ҶУМҲУРИИ ТОҶИКИСТОН БАРОИ СОЛҲОИ 2016-2020
Мутобиқи моддаи 6 Қонуни Ҷумҳурии Тоҷикистон "Дар бораи зотпарварӣ" ва бо мақсади рушди минбаъдаи соҳаи зотпарварию хушзоткунӣ, афзун гардонидани саршумор ва маҳсулнокии чорвои зотӣ Ҳукумати Ҷумҳурии Тоҷикистон қарор мекунад:
- Барномаи рушди соҳаи зотпарварӣ ва хушзоткунии чорво барои солҳои 2016-2020 тасдиқ карда шавад (замима мегардад).
- Маблағгузории Барнома аз ҳисоби маблағҳои буҷети ҷумҳуриявӣ, ҷалби маблағҳои хоҷагиҳои фермерӣ, грантҳои ташкилотҳои ватанию хориҷӣ ва қарзҳои бонкӣ амалӣ карда шавад.
- Вазорати кишоварзии Ҷумҳурии Тоҷикистон, Вазорати рушди иқтисод ва савдои Ҷумҳурии Тоҷикистон, Кумитаи давлатии сармоягузорӣ ва идораи амволи давлатии Ҷумҳурии Тоҷикистон дар давраи солҳои 2016-2020 бо мақсади иҷрои Барномаи зикргардида ҷиҳати ҷалби сармояи ватанию хориҷӣ тадбирҳои зарурӣ андешанд.
- Вазорати кишоварзии Ҷумҳурии Тоҷикистон, дар якҷоягӣ бо вазорату идораҳои дахлдор, мақомоти иҷроияи ҳокимияти давлатии Вилояти Мухтори Кўҳистони Бадахшон, вилоятҳо, шаҳру ноҳияҳо татбиқи самараноки Барномаи мазкурро таъмин намуда, ҳар сол то 1 феврал аз ҷараёни иҷрои он ба Ҳукумати Ҷумҳурии Тоҷикистон ахбор манзур намоянд.
Раиси
Ҳукумати Ҷумҳурии Тоҷикистон Эмомалӣ Раҳмон
аз 30 декабри соли 2015, № 792
ш. Душанбе