ҚАРОРИ

МАҶЛИСИ ОЛИИ

ҶУМҲУРИИ ТОҶИКИСТОН 

ДАР БОРАИ АВФИ УМУМӢ

(Ахбори Маҷлиси Олии Ҷумҳурии Тоҷикистон, соли 1998, №23-24, мод. 328)

Ба муносибати ҳафтумин солгарди истиқлоли Ҷумҳурии Тоҷикистон ва яксолагии ба имзо расидани Созишномаи умумии истиқрори сулҳ ва созгории миллӣ дар Ҷумҳурии Тоҷикистон, бо дар назардошти принсипи башардўстӣ ва мувофиқи моддаи 49 Конститутсияи (Сарқонуни) Ҷумҳурии Тоҷикистон, Маҷлиси Олии Ҷумҳурии Тоҷикистон қ а р о р   м е к у н а д:

1. Аз ҷазои маҳрумӣ аз озодӣ, сарфи назар аз мўҳлати ҷазои таъиншуда, инчунин аз ҷазоҳои бо маҳрум кардан аз озодӣ алоқаманд набуда, маҳкумшудагони зайл аз ҷазо озод карда шаванд:

а) занон;

б) мардони аз 50 – сола боло;

в) маъюбони гурўҳҳои I ва II;

г) иштирокчиён ва собиқадорони Ҷанги Бузурги Ватанӣ ва ашхоси ба онҳо баробаркардашуда, иштирокчиён ва собиқадорони амалиётҳои ҷангӣ дар ҳудуди дигар давлатҳо;

д) ноболиғон;

е) ашхосе, ки бо ордену медалҳои СССР ва Ҷумҳурии Тоҷикистон мукофотонида шудаанд;

ж) ашхосе, ки аз даъвати навбатӣ ба  хизмати ҳақиқии ҳарбӣ саркашӣ намудаанд, худсарона баромада рафтаанд, худсарона қисм ё маҳалли ҳизматро тарк кардаанд, дезертирӣ кардаанд ё ашхосе, ки аз хизмати ҳарбӣ бо роҳи маъюб кардани худ ё усули дигар саркашӣ кардаанд.

2. Маҳкумшудагоне, ки барои аз беэҳтиётӣ ҷиноят содир намудан ба мўҳлати то даҳ соли пурра аз озодӣ маҳрум шудаанд, аз ҷазо озод карда шаванд.
3. Маҳкумшудагоне, ки барои қасдан содир кардани ҷиноят ба мўҳлати то панҷ соли пурра аз озодӣ маҳрум карда шудаанд, аз ҷазо озод карда шаванд.
4. Маҳкумшудагоне, ки шартан аз озодӣ марум гардида, ба меҳнати ҳатмӣ ҷалб кардан шудаанд, аз ҷазо озод карда шаванд.
5. маҳкумшудагоне, ки шартан аз озодӣ маҳруб гардида, мўҳлати иҷрои ҳукми онҳо маъқуф гузошта шудааст, онҳое, ки аз маҳалли маҳрумият аз озодӣ ба шарти ҳатман ба меҳнат ҷалб гардидан озод шудаанд, инчунин онҳое, ки ба дигар ҷазои новобаста ба маҳрумият аз озодӣ маҳкум гардидаанд, аз ҷазо озод карда шаванд
6. Тафтиши ҳамаи парвандаҳои тафтишотӣ ва парвандаҳое, ки аз тарафи судҳо баррасӣ нагардидаанд, қатъ карда шаванд:

а) дар бораи ҷиноятҳое, ки то эътибор пайдо кардани ҳамин қарор аз тарафи

ашхоси дар банди 1 ҳамин қарор номбаршуда содир гардидаанд;

б) дар хусуси ҷиноятҳое, ки барои онҳо Кодекси ҷиноятии Ҷумҳурии Тоҷикистон

ҷазоҳои бо маҳрум кардан аз озодӣ вобастанабударо пешбинӣ намудааст;

в) нисбати ашхосе, ки аз беэҳтиётӣ ҷиноят содир кардаанд ва ба он Кодекси ҷиноятии Ҷумҳурии Тоҷикистон ҷазои маҳрумӣ аз озодиро ба мўҳлати то даҳ сол пешбинӣ намудааст;

г) нисбати ашхосе, ки қасдан ҷиноят содир намудаанд ва Кодекси ҷиноятии Ҷумҳурии Тоҷикистон барои он ба мўҳлати то панҷ сол ҷазои аз озодӣ маҳрум карданро пешбинӣ намудааст.

7. Мўҳлати адонагардидаи ҷазои ашхоси зерин кам карда шавад:

а ) онҳое, ки барои содир намудани ҷиноят ба мўҳлати то даҳ соли пурра аз

озодӣ маҳрум шудаанд – нисфи мўҳлати ҷазо;

б) онҳое, ки барои аз беэҳтиётӣ ҷиноят содир кардан маҳкум шудаанд, новобаста аз мўҳлати ҷазо – аз се ду ҳисса;

в) онҳое, ки барои қасдан содир намудани ҷиноят ба мўҳлати то понздаҳ сол аз озодӣ маҳрум гардидаанд – сеяки мўҳлати ҷазо.

8. Ба ашхосе, ки барои ҷиноятҳои зерин ба ҷавобгарии ҷиноятӣ кашида шудаанд ё маҳкум гардидаанд, амали бандҳои 1,3 ва зербандҳои «а» ва «г» банди 6 ҳамин қарор татбиқ карда нашаванд:

а) барои ҷиноятҳои махсусан хавфноки давлатӣ бо моддаҳои 61-70;

б) барои ҷиноятҳои пешбининамудаи моддаҳои 74; 75 қ.2; 76 қ.2,3; 89 қ.4; 90 қ.4; 91 қ.2; 95 қ.2,3; 99 қ.2; 104; 105; 111 қ.2; 121; 135 қ.3; 156 қ.2; 160 қ.3; 161 қ.3; 186 қ.2,3; 187 қ.2; 187¹ қ.2; 220 қ.3; 227 қ.3; 234 қ.2; 240; 240¹; 240²; 241; 242; 250 б. «в»; 252 б. «б»; 261 б. «в»; 270 б. «в»; 271; 276; 277 Кодекси ҷиноятии Ҷумҳурии Тоҷикистон;

в) ба ашхосе, ки пас аз 1 сентябри соли 1998 ҷиноятҳои зеринро содир кардаанд ва ба ҷавобгарии ҷиноятӣ кашида шудаанд ё маҳкум гардидаанд, амали бандҳои 1,3 зербандҳои «а» ва «г» банди «б» ҳамин қарор татбиқ карда намешавад:

- барои ҷиноятҳои ба муқобили асосҳои сохти конститутсионӣ ва амнияти давлат бо моддаҳои 305-313; барои ҷиноятҳои пешбинӣ намудаи моддаҳои 104; 110 қ.2,3; 130; 131 қ.3; 138; 139 қ.3; 179; 181; 184 қ.3; 186; 195 қ.2,3,4; 199 қ.Қ4; 200; 201; 202; 203 қ.3; 204; 205 қ.2; 244 қ.3,4; 245 қ.4; 248 қ.2,3,4; 249; 250 қ.2,3,4; 252 қ.2; 357; 368; 369 қ.2,3; 370 қ.2,3; 382; 386 қ.4; 391 қ.2,3,4 Кодекси ҷиноятии Ҷумҳурии Тоҷикистон;

г) ашхоси рецидевисти махсусан хавфнок;

д) онҳое, ки пештар ба тариқи бахшиши ҷазо ё авфи умумӣ ё бахшидани ҷазо татбиқ карда шудааст, нагузашта бошад;

е) ашхосе, ки режими нигаҳдориро барқасдона вайрон кардаанд.

9. Ба ашхосе, ки нисбати онҳо дар қатори ҷазо барои содир намудани ҷиноят чораҳои маҷбурии табобатӣ аз майзадагӣ, нашъамандӣ ё бемориҳои олоти таносул таъин гардидаанд ва бояд мутобиқи қарори мазкур аз ҷазо озод карда шаванд, санади авф пас аз ба итмом расидани курси пурраи табобат мавриди иҷро қарор дода мешавад.
10. Таҳти амали қарори мазкур ашхосе қарор мегиранд, ки аз ҷониби мақомоти тафтишотӣ ба ҷавобгарии ҷиноятӣ кашида шудаанд ё аз ҷониби судҳои Ҷумҳурии Тоҷикистон маҳкум шудаанд ва то эътибор пайдо кардани ҳамин қарор ҷиноят содир намудаанд.
11. Ҳамин тариқ қарор пас аз интишори расмиаш мавриди амал қарор дода мешавад ва дар давоми шаш моҳ мавриди иҷро қарор гирад.

Раиси

Маҷлиси Олии

Ҷумҳурии Тоҷикистон                                                                           С. Раҷабов

ш. Душанбе, 13 ноябри соли 1998

№ 706

ҚАРОРИ

МАҶЛИСИ ОЛИИ

ҶУМҲУРИИ ТОҶИКИСТОН 

ДАР БОРАИ ТАРТИБИ ТАТБИҚИ ҚАРОРИ МАҶЛИСИ ОЛИИ ҶУМҲУРИИ ТОҶИКИСТОН

«ДАР БОРАИ АВФИ УМУМӢ»

(Ахбори Маҷлиси Олии Ҷумҳурии Тоҷикистон, соли 1998, №23-24, мод. 329)

Маҷлиси Олии Ҷумҳурии Тоҷикистон қ а р о р   м е к у н а д:

1. Иҷрои Қарори Маҷиси Олии Ҷумҳурии Тоҷикистон «Дар бораи авфи умумӣ» ба зиммаи инҳо гузошта шавад:

а) мақомоте, ки иҷрои ҷазо нисбати маҳкумшудагоне, ки дар ҷойҳои маҳрумият аз озодӣ мебошанд, онҳое, ки шартан аз озодӣ маҳрум гардидаанд ва ба меҳнати ҳатмӣ ҷалб карда шудаанд аз ҷойҳои маҳрумият аз озодӣ бо ҳатман ба меҳнат ҷалб кардан озод карда шудаанд, дар иштиёрашон мебошад.

Иҷрои Қарори Маҷлиси Олии Ҷумҳурии Тоҷикистон «Дар бораи авфи умумӣ» (минбаъд дар матн – Қарор дар бораи авф) тибқи қарори сардори мақомоте, ки иҷрои ҷазоро анҷом медиҳанд ва аз ҷониби прокурор иҷозат дода шудааст, сурат мегирад;

б) ба мақомоти таҳқиқи ибтидоӣ ва тафтиши пешакӣ – нисбати ашхосе, ки парванда ва маводи ҷиноятҳояшон таҳти баррасии ин мақомот қарор доранд;

в) ба зиммаи судҳо:

нисбати ашхосе, ки парванда ва маводи оид ба ҷиноятҳояшон дар суд таҳти баррасӣ қарор дошта, то эътибор пайдо намудани Қарор дар бораи авф баррасӣ нашудаанд, инчунин ашхосе, ки парвандаҳо дар бораи ҷиноятҳои онҳо баррасӣ гардида, вале ҳукми онҳо қувваи қонунӣ пайдо накардаанд;

нисбати маҳкумшудагоне, ки иҷрои ҳукмашон ба таърих андохта шудааст ва ашхосе, ки шартан маҳкум гардидаанд (масъалаи татбиқи авф аз рўи пешниҳоди мақоми корҳои дохилие, ки рафтори маҳкумшударо назорат менамояд, аз ҷониби суде, ки ҳукм баровардааст, ҳал карда мешавад);

нисбати ашхосе, ки ба ҷазои ҷарима маҳкум шудаанд, агар  то эътибор пайдо кардани қарор дар бораи авф ҷарима ситонида нашуда бошад (масъалаи татбиқи авфро суде, ки ҳукм баровардааст, ҳал менамояд);

нисбати ашхосе, ки шартан пеш аз мўҳлат аз ҷазо озод карда шудаанд ва ашхосе, ки қисми адонагардидаи ҷазояшон то эътибор пайдо намудани Қарор дар бораи авф ба ҷазои сабуктар иваз карда шудааст (масъалаи татбиқи санади авфро суде, ки дар бораи татбиқи шартан пеш аз мўҳлат озод кардан ё ба ҷазои сабуктар иваз кардани қисми адонашудаи ҷазо таъинот баровардааст, ҳал мекунад);

г) ба зиммаи мақомоти корҳои дохилӣ:

нисбати ашхосе, ки ҳукмро нисбати онҳо қувваи қонунӣ пайдо кардаанд, ашхосе, ки ба маҳрумият аз озодӣ маҳкум шудаанду дар ҳабс нестанд ё шахсоне, ки шартан ба маҳрумият аз озодӣ бо ҳатман ҷалб намудан ба меҳнат маҳкум гардида, ба маҳалли кор фиристода нашудаанд;

нисбати ашхосе, ки ҷазоро дар шакли корҳои ислоҳи меҳнатӣ бидуни маҳрумият аз озодӣ адо мекунанд, маҳрум намудан аз ҳуқуқи ишғоли мансабҳои муайян ё машғул шудан ба фаъолиятҳои муайян;

д) ба зиммаи фармондеҳии қисмҳои интизомии ҳарбӣ – нисбати хизматчиёни ҳарбие, ки ба фиристодан ба қисмҳои интизомии ҳарбӣ маҳкум гардидаанд.

2. Қарори татбиқ ё татбиқ накардани санади авф барои ҳар шахс алоҳида қабул карда мешавад.
3. Қарори татбиқи авф, ки мақомоти таҳқиқи ибтидоӣ ва тафтиши пешакӣ, мақомоти корҳои дохилӣ, инчунин фармондеҳии қисмҳои интизомии ҳарбӣ қабул мекунанд, аз ҷониби прокурор иҷозат дода мешавад.

Ҳангоми татбиқи санади авф аз ҷониби судҳо иштироки прокурор ҳатмист.

4. Адои ҷазо дар шакли корҳои ислоҳи меҳнатӣ бе маҳрумият аз озодӣ аз рўзи баровардани қарор аз ҷониби мақомоти корҳои дохилӣ дар бораи татбиқи санади авф, ки прокурор тасдиқ кардааст, қатъ мегардад.
5. Ҳангоми татбиқи санади авф нисбати ашхосе, ки мўҳлати ҷазояшон бо тартиби бахшиши ҷазо ё авф кам карда шудааст, мўҳлати ҷазое, ки мутобиқи санади бахшиши ҷазо ё авф муқаррар гардидааст, ба инобат гирифта шавад.
6. Ашхосе, ки таҳти авф қарор мегиранд, ҳам аз ҷазои асосӣ ва ҳам аз ҷазои иловагӣ озод карда мешаванд, агар ҷазои иловагӣ то рўзи эътибор пайдо намудани Қарор дар бораи авф адо нагардида бошад.
7. мутобиқи банди 7 Қарор дар бораи авф қисми мўҳлати ҷазо, ки то рўзи эътибор пайдо кардани қарори номбаршуда адо нагардидааст, кам карда мешавад.
8. маводи ашхосе, ки таҳти амали Қарор дар бораи авф қарор мегиранд ва мувофиқи тартиби муқарраргардида ба онҳо табобати маҷбурӣ аз майзадагӣ, нашъамандӣ ё бемориҳои олоти таносул таъин гардидааст, дар давраи иҷрои қарори зикршуда баррасӣ гардида, қарор дар бораи озод намудани онҳо танҳо пас аз ба охир расидани давраи пурраи табобати маҷбурӣ мавриди иҷро қарор дода мешавад.

Барои анҷомёфта донистани муолиҷаи касалии зўҳравӣ маҳкумшуда хулосаи тиббӣ ва нисбати ашхосе, ки суд аз майзадагӣ ё нашъамандӣ табобати маҷбурӣ фармудааст, таъиноти суд дар бораи қатъ кардани табобати маҷбурӣ асос мебошад.

9. Вайронкунандагони барқасди режими нигаҳдорӣ маҳкумшудагоне ҳисобида мешаванд, ки мунтазам талаботи режимро вайрон мекунанд ва вобаста ба вазнинии вайронкунии содиркардаашон камаш се ҷазои интизомии мўҳлаташ адонашуда ё бекорнашуда дошта бошанд.
10. Дар ҳолатҳое, ки агар масъалаи истифодаи санади авф пас аз мўҳлати шашмоҳаи пас аз санаи эътибор пайдо кардани Қарор дар бораи авф ба миён ояд, он мувофиқи тартиби пешбининамудаи банди 1 ҳамин Қарор иҷро карда мешавад.
11. Суди Олии Ҷумҳурии Тоҷикистон, Прокурори генералии Ҷумҳурии Тоҷикистон, Вазорати корҳои дохилии Ҷумҳурии Тоҷикистон, Вазорати амнияти Ҷумҳурии Тоҷикистон ва Вазорати адлияи Ҷумҳурии Тоҷикистон дар муддати як моҳи пас аз гузаштани мўҳлати амали Қарори авф ба Раёсати Маҷлиси Олии Ҷумҳурии Тоҷикистон дар хусуси иҷрои он ҳисобот пешниҳод намоянд.

Раиси

Маҷлиси Олии

Ҷумҳурии Тоҷикистон                                                                                                 С. Раҷабов

ш. Душанбе, 13 ноябри соли 1998

№ 707